आंधळीतील घरफोडीप्रकरणी चोरटा जेरबंद

दहिवडी पोलिसांची कामगिरी; सोन्याच्या दागिन्यांसह रोकड हस्तगत

दहिवडी : आंधळी ता. माण येथिल बंद असलेल्या घरांचे कुलूप तोडून ऐवज लंपास करणाऱ्या चोरट्यास जेरबंद करण्याची कामगिरी दहिवडी पोलिसांनी केली, रामचंद्र भुजाब शेंडे या संशयित आरोपीचे नाव असून त्याच्याकडून चोरीस गेलेला मुद्देमाल शंभर टक्के हस्तगत करण्यात पोलिसांना यश आले आहे.

याबाबत पोलिसांनी दिलेली माहिती अशी, आंधळी (ता. माण) गावातील शेंडेमळा येथे राहणाऱ्या कमल तानाजी शेंडे यांच्या घरातील पत्र्याच्या कनगीतील डब्यात ठेवलेले एक लाख ६८ हजार रुपये किमतीचे दागिने व सहा हजार रुपये रोख रक्कम असा मुद्देमाल चोरीस गेला होता. याबाबत कमल शेंडे यांनी दिलेल्या तक्रारीवरून दहिवडी पोलिस ठाण्यात गुन्हा दाखल करण्यात आला होता. त्यानुसार दहिवडी पोलिस ठाण्याचे सहाय्यकपोलीस निरीक्षक दत्तात्रय दराडे, पोलिस उपनिरीक्षक चांदणी मोटे, स्वाती धोंगडे, गुलाब दोलताडे व नितीन धुमाळ, पोलिस कॉन्स्टेबल अजिनाथ नरबट,नीलेश कुदळे, महेंद्र खाडे व लक्ष्मण कुचेकर यांनी गुन्ह्यातील संशयित आरोपीचा शोध घेण्यास सुरुवात केली. गोपनीय बातमीदारामार्फत मिळालेल्या माहितीवरून रामचंद्र भुजाब शेंडे (वय ५४, रा. शेंडेमळा, आंधळी, ता. माण) यास ताब्यात घेण्यात आले. त्याच्याकडे गुन्ह्याच्या अनुषंगाने तपास केला असता त्याने गुन्ह्याची कबुली दिली. त्याच्याकडून सर्व मुद्देमाल हस्तगत करण्यात आला आहे. पुढील तपास पोलिस उपनिरीक्षक स्वाती धोंगडे करीत आहेत.