चूल आणि मूल या चौकटीतून बाहेर पडून स्वतःची स्वतंत्र ओळख निर्माण करण्यासाठी महिला वर्गाने मोठा संघर्ष केला आहे. सध्याच्या काळात सर्वच क्षेत्रांमध्ये महिला पुरुषांच्या बरोबरीने, त्यांच्या खांद्याला खांदा लावून कर्तृत्व गाजवत आहेत. मात्र, बदलत्या काळात महिलांची ही मानसिकता बदलताना दिसून येत आहे. त्यामागे अनेक कारणे असून ती विचार करायला लावणारी आहेत.
मानसिक शांतता
सध्याच्या काळात नोकरीच्या ठिकाणी महिला अनेक महत्त्वाच्या जबाबदाऱ्या पार पाडत असल्या तरी देखील विशेषतः कॉर्पोरेट क्षेत्रात काम करणाऱ्या महिलांना अनेक आव्हानांना सामोरे जावे लागते. त्या कर्तृत्वात कोठेही कमी नसल्या तरी देखील त्यांना ऑफिसमधील अंतर्गत राजकारण, टार्गेट पूर्ण करण्याचा ताण आणि जबाबदाऱ्या पार पाडताना होणारी ओढाताण महिलांना थकवताना दिसत आहे.
कौटुंबिक जबाबदाऱ्या
आपल्या कामाच्या ठिकाणी महिला कितीही उच्चपदस्थ असली तरी देखील घरातील कौटुंबिक जबाबदाऱ्यांपासून त्यांची सुटका होत नाही. घरातील स्वयंपाक पाणी, मुलांचे पालन पोषण या जबाबदाऱ्या प्रामुख्याने महिलांनाच पार पाडाव्या लागतात. कौटुंबिक जबाबदाऱ्या आणि नोकरीतील जबाबदाऱ्या या दोन्ही सारख्याच क्षमतेने पार पाडणे सर्वच महिलांना शक्य होत नाही. त्यामुळे त्या कौटुंबिक जबाबदारीला प्राथमिकता देतात.
कामाच्या समाधानाचा अभाव
अनेकदा चांगले शिक्षण घेऊन देखील महिलांना नोकरीच्या ठिकाणी अपेक्षित पद मिळत नाही. वेतनमानात ही भेदभाव होतो. कितीही जीव तोडून काम केले तरीदेखील त्याची दखल घेतली जातेच असे नाही.
अशा अनेक कारणांमुळे सुशिक्षित महिला देखील नोकरी करण्यापेक्षा गृहिणी बनण्यास पसंती देत आहेत. अनेक तरुणी उच्च शिक्षण घेऊन काही काळ नोकरी करणे आणि लग्नानंतर लगेच किंवा काही वर्षांनी गृहिणीची भूमिका पार पाडणे पसंत करीत आहेत.
About The Author
.jpeg)
