पुणे: प्रतिनिधी
पुणे ते नागपूर दरम्यान धावणाऱ्या वंदे भारत एक्सप्रेस या वेगवान रेल्वे गाडीला 10 ऑगस्ट रोजी पंतप्रधान नरेंद्र मोदी यांच्या हस्ते हिरवा झेंडा दाखवला जाणार आहे. विदर्भ आणि पश्चिम महाराष्ट्रातील रेल्वे प्रवास या गाडीमुळे वेगवान आणि सुलभ होणार आहे.
ही गाडी वर्धा, बडनेरा, अकोला, भुसावळ, जळगाव, मनमाड, कोपरगाव, अहमदनगर,दौंड या स्थानकांवर थांबणार आहे. पुणे ते नागपूर दरम्यान वंदे भारत एक्सप्रेसच्या अधिक वेगवान आणि अधिक आरामदायक रेल्वे सेवेला प्रवाशांकडून चांगला प्रतिसाद लाभेल, असा रेल्वे प्रशासनाला विश्वास आहे.
वंदे भारत एक्सप्रेसच्या सेवेमुळे शिक्षण, उद्योग, कृषी, आरोग्य सेवा अशा अनेक क्षेत्रात वाढ होण्याची शक्यता असून त्यामुळे एकूणच महाराष्ट्राच्या विकासाला हातभार लागणार आहे, असा विश्वास केंद्रीय राज्यमंत्री मुरलीधर मोहोळ यांनी व्यक्त केला.
पायाभूत सुविधांमध्ये अधिक वाढ करून त्याचा लाभ शहरी आणि ग्रामीण अशा दोन्ही भागांना प्रदान करून विकासामध्ये प्रादेशिक संतुलन राखण्याच्या प्रयत्नांचा एक भाग म्हणून देखील वंदे भारत रेल्वे सेवा उपयुक्त ठरणार आहे.
About The Author
