मुंबई: प्रतिनिधी
पाकिस्तानातून 14 दहशतवादी 400 किलो आरडीएक्ससह भारतात दाखल झाले असून गणेश विसर्जन मिरवणुकीच्या पार्श्वभूमीवर मुंबईत मोठे स्फोट घडवून आणण्याची धमकी मुंबई पोलिसांच्या वाहतूक शाखेच्या व्हाट्स ॲपवर देण्यात आली आहे. या प्रकाराची चौकशी मुंबई पोलिसांनी सुरू केली आहे.
गणेश विसर्जन हा मुंबईसह संपूर्ण महाराष्ट्रात मोठ्या प्रमाणावर साजरा केला जाणारा उत्सव आहे. एकाच वेळी मनाला लागणारी हुरहुर आणि ओसंडून वाहणारा उत्साह गणेश विसर्जन मिरवणुकीत मोठ्या प्रमाणावर दिसून येतो. या निमित्ताने मोठा जनसागर रस्त्यावर उतरतो. त्यामुळे या काळात स्फोट घडवून मोठ्या प्रमाणावर दहशत निर्माण करण्याचा पाकिस्तानी कट असल्याचे या धमकीवरून दिसून येत आहे.
पोलिसांकडून या धमकीची खातरजमा केली जात असून तांत्रिक आणि खबऱ्यांच्या माध्यमातून या धमकीमागील वस्तुस्थिती जाणून घेण्याचा प्रयत्न पोलिसांकडून केला जात आहे. त्याचप्रमाणे मिरवणुकीचे निमित्ताने कडेकोट बंदोबस्त शहरात तैनात करण्यात आला आहे.
About The Author
