बारामती (वा.) : शहरातील बांधकाम व्यवसायाकडून गृह प्रकल्पाचा प्रस्ताव मंजूर करण्यासाठी दोन लाख रुपयांची लाचेची मागणी करून त्यातील एक लाख रुपये रकमेची लाच स्वीकारताना बारामती नगर परिषदेचे नगररचनाकार विकास किसनराव ढेकळे याला लाचलुचपत प्रतिबंधक विभागाच्या पथकाने रंगेहात पकडून अटक केली.
या कारवाईमुळे बारामती शहरात खळबळ उडाली आहे. बारामती शहरातील औद्योगिक वसाहत परिसरातील रुई याठिकाणी निर्मिती विहार इमारत बी विंग १ , या गृह प्रकल्पाचा प्रस्ताव बारामती नगर परिषदेच्या नगररचना विभागाकडे मंजुरीसाठी दाखल केलेला आहे. सदर प्रस्ताव मंजुरीसाठी नगररचनाकार विकास ढेकळे यांनी तक्रारदारांना दोन लाख रुपयांची मागणी केली होती. याबाबतची तक्रार १९ मार्च २०२५ रोजी लाचलुचपत प्रतिबंधक विभागाकडे तक्रारदाराने केली. दरम्यान तडजोडी अंती १ लाख ७५ हजार रुपयांची मागणी नगर रचनाकार ढेकळे यांनी केली. लाचलुचपत प्रतिबंधक विभागाकडे करण्यात आलेल्या तक्रारीनंतर या विभागाने तक्रारीची पडताळणी केली, त्यानुसार तक्रारदाराने १ लाख ७५ हजार रुपये रकमेपैकी १ लाख रुपयांचा पहिला हप्ता देण्याचे ठरले. सदर रक्कम ढेकळे यांनी बारामती शहरातील ऑक्सिजन जिम या ठिकाणी दि १९ मार्च रोजी देण्यासाठी तक्रारदाराला बोलावले.
यादरम्यान लाचलुचपत प्रतिबंधक पुणे विभागाचे पोलीस अधीक्षक शिरीष सरदेशपांडे, अप्पर पोलीस अधीक्षक डॉ शीतल जानवे खराडे यांच्या मार्गदर्शनाखाली लाचलुचपत प्रतिबंधक विभागाचे पोलिस निरीक्षक अमोल भोसले, पोलीस हवालदार किरण चिमटे, महिला पोलिस शिपाई कोमल शेटे, चालक पोलिस शिपाई दीपक दिवेकर आदींच्या पथकाने सापळा लावला. दि १९ रोजी रात्री आठ वाजता बारामती शहरातील ऑक्सिजन जिम याठिकाणी १ लाख रुपयांची लाच नगररचनाकार ढेकळे यांनी तक्रारदार बांधकाम व्यावसायिक यांच्याकडून स्वीकारली , याच वेळी लाच लुचपत प्रतिबंधक विभागाने छापा टाकून ढेकळे यांना रंगेहात पकडले. त्यांच्या ताब्यातील १ लाख रुपये व मोबाईल जप्त केला. बारामती शहर पोलिस ठाण्यात आरोपी विकास ढेकळे यांच्या विरुद्ध गुन्हा दाखल करण्यात आला आहे.
000
About The Author
.jpeg)
