कोल्हापूर: प्रतिनिधी
राज्याचे उपमुख्यमंत्री अजित पवार हे सध्या रॉबिन हूडसारखे वागू लागले आहेत. मात्र, आपण अजितदादांची दादागिरी मोडून काढल्याशिवाय राहणार नाही, असा इशारा स्वाभिमानी शेतकरी संघटनेचे नेते माजी खासदार राजू शेट्टी यांनी दिला आहे.
अवैध मुरूम उत्खननावर कारवाई करण्यासाठी गेलेल्या महिला आयपीएस अधिकारी अंजना कृष्णा यांना धमकी देतानाचा अजित पवार यांचा व्हिडिओ व्हायरल झाला आहे. त्यावरून पवार यांना मोठ्या प्रमाणावर टीकेचे लक्ष्य केले जात आहे. अवैध कृत्यांना पाठीशी घालण्याचा आपला उद्देश नव्हता. केवळ शांतता राहावी यासाठी आपण पोलीस अधिकाऱ्यांना आदेश दिले. कर्तव्यदक्ष महिला पोलीस अधिकाऱ्यांबद्दल आपल्या मनात आदरच आहे, असे स्पष्टीकरण पवार यांनी दिले आहे. त्यानंतर देखील या प्रकरणावर चर्चा आणि टीकाटिप्पणी सुरूच आहे.
अजित पवार हे रॉबिन हूड या गुंडासारखे वागू लागले आहेत. बेकायदेशीर कृत्यांना पाठीशी घालणे, त्यासाठी अधिकाऱ्यांना धमकावणे, प्रशासनावर दबाव आणून चुकीचे निर्णय घेण्यास भाग पाडणे अशा प्रकारची दादागिरी अजितदादा करत असल्याची टीका शेट्टी यांनी केली. मात्र, ही दादागिरी आपण खपवून घेणार नाही. ती मोडून काढल्याशिवाय राहणार नाही, असा इशाराही त्यांनी दिला.
About The Author
