भारत रशिया मैत्रीमुळे अमेरिकेच्या पोटात कळ

वॉशिंग्टन: वृत्तसस्था 

भारत आणि रशियाच्या मैत्रीमुळे अमेरिकेच्या पोटात कळ आली आहे. अमेरिकेचे वाणिज्यमंत्री हॉवर्ड लुटनिक यांनी भारताची रशियाकडून शस्त्र खरेदी आणि भारताचा ब्रिक्स संघटनेत सहभाग याबद्दल अमेरिकेच्या पोटातील मळमळ व्यक्त केली आहे. 

भारत रशियाकडून शस्त्र खरेदी करत आहे. हा अमेरिकेला त्रास देण्याचा एक प्रकार आहे. भारत ब्रिक्स या संघटनेत सहभागी आहे. ब्रिक्स मधील देशांना डॉलरचे वर्चस्व मान्य नाही, असे लुटनिक यांनी एका मुलाखतीत सांगितले. भारत सरकारकडून अशा काही गोष्टी घडल्या आहेत की ज्याचे अमेरिकेवर वाईट परिणाम होतात, असेही ते म्हणाले. 

रशिया हा भारताचा विश्वासू मित्र आहे. भारताची सर्वाधिक शस्त्र खरेदी रशियाकडून केली जाते. तरी देखील भारत थेटपणे रशिया किंवा अमेरिका या दोन्ही देशांच्या दावणीला बांधला गेलेला नाही. भारताच्या हितानुसार भारत आपले परराष्ट्र धोरण निश्चित करेल, अशी भारताची त्रयस्थ भूमिका आहे. मात्र, भारत आणि रशियाची मैत्री अमेरिकेच्या डोळ्यात खुपत आहे. त्यामुळे अमेरिकेचे अध्यक्ष डोनाल्ड ट्रम्प यांच्या प्रशासनातील काही मंडळी भारतावर टीका करत असून भारत आणि अमेरिका यांच्यातील संबंध ताणले जाण्याची शक्यता आहे.

हे पण वाचा  संशयित गुप्तहेर फेसबुकद्वारे पाकिस्तानला द्यायचा माहिती

यापूर्वी ऑपरेशन सिंदूर दरम्यान ट्रम्प यांनी अतिउत्साह दाखवून भारत किंवा पाकिस्तान यांनी अधिकृत घोषणा करण्यापूर्वीच दोन्ही देशातील युद्धविरामाची समाज माध्यमातून घोषणा करून टाकली. या युद्धविरामाचे श्रेय घेण्याची घाई ट्रम्प यांना झाली होती. त्यामुळे केंद्र सरकारला टीकेचे लक्ष्य व्हावे लागले. मात्र, भारताने ट्रम्प यांना या युद्धविरामाचे श्रेय मिळू दिलेले नाही. दोन्ही देशांनी मिळून युद्धविरामाचा निर्णय घेतल्याचे भारताने स्पष्ट केले. ट्रम्प यांच्यापाठोपाठ त्यांच्या प्रशासनातील इतर काही लोक देखील भारतावर टीका करू लागले आहेत.